Kom(kujî)ar !

 Şemsettin AKTAŞ

Dewleta Tirkiyeyê 84.mîn salvegera damezrandina Komar'a xwe pîroz dike.

Giregirên dewletê(Yaşar, Gul, Tayyib, Babacan, û ...) ji bo vê rojê(29 ê Cotmehê) peyaman diweşînin. Lê çi peyam ?

Tu dikare bêje hemî bi yek qelemê hatiye nivîsandin. Hemî banga şer dikin. Li dijî kê ? Bêgûman li dijî Kurdan.

Ka qaşo wan jî digotin ev welat û dewlet û komar bi xwîna Tirk û Kurdan hatiye avakirin û herdu gel endamên bingehîn e !

Na herê, çi endamê bingehîn, weke mirovên bi navê xwe jî nayê hejmartin û pejirandin.

Bi tenê Tirk heye. Eger miletekî din bêje ez heme, bi tenê mafê wî yê kolebûnê ji bo Tirkan heye. Ev gotina Mahmut Esat Bozkurt e; di salên 1924-30 de Wezirê Edaletê bû qaşo.

De kerem bike bibîne, ku ev Komar li ser çi bingehek bi EDALET/wekhevî hatiye ava kirin !  Hema li Cemil Çiçek mêze bikin hûnê Bozkurtê/Gurêgewrê modern bibînin.

Diyare ku, ev 84 sale Komar berbe demokrasiyê neçûye. Berovajî paş ve meşiya ye. Hîn pirtir nijadperest û xwînrij bûye. Loma mirov dikare jêre bêje Komara Komkujiyê.

Dibe ku dîrok xwe dubare jî dike, Deniz Baykal jî qaşo huquqnase/parêzer e. Zeki Sezer jî doktor e û hwd. Ma ne ecêbe/sosret e ? Van kesên diviya wekhevî, aşîtî, saxî û mirovatî bi parastan, lê mixabin ji Yaşar Paşa û Devlet Bahçeli pirtir şer dixwazin û nijadperestiyê diparêzin.

                     *  *  *

Ali Babacan, piştî Suriye, İsrail, Filistin û Iraqê berê xwe da İranê. Wisa tête dîtin, ku ji van gerên diplomasî, ew tiştên dixwestin bi dest ne xistin.

Li gor gotina wan Beşarê Esed, êrişa li ser Başûr pejirandibû. Lê piştî vegera Şamê, Beşar, got 'min wisa negotibû'.

Heyetek/şandek e mezin ji Iraqê hate Tirkiyeyê û gelek hêvî jê dihate kirin. Lê ev jî bi serneket û heyet/şande bi xeyd vegeriya Iraqê.

Hemî hêviya wan mabû Iran. Erê Babacan gelek bi şox û şeng hate pêşivazî kirin û pir dimenên devliken danê medyayê. Lê ji vira jî destvala vegeriya.

Bi tenê hewara wan maye Bush, ku Erdogan di hefteya pêş de diçe ziyaret/tewafa wî. Lê gûmana serkevtinê di vir de jî diyar nake.

                     *  *  *

Ji xwe serkêşê govenda şer/cengê Yaşar û Başbug Paşa, ji mêj ve erîşên xwe yên leşkerî dirêjî Başûrê Kurdistanê jî kirin e.

Ez nabêjim operasyon, ji ber ku, ev gotin xelite. Çi operasyon, li Kurdistanê êdî herb/ceng heye û komkujî ne bi tenê li ser mirovan heye, komkujî li ser xwezayê û erdnigariyê û ajalan jî tête meşandin. Heta ne li Kurdistanê bi tenê, êdî li bajarên Tirkiyeyê û Avrupa jî heman êrîşkariyê dimeşînin.

Erê raste em kesek şer naxwazin, lê bila her kes û bi taybetî jî xwediyê vê Komara Komkuj bizanibe, di encama vê cengê de, ne ew, belê Kurd bi serdikevin û Kurdistaneke Azad ava dibe.

Şemsettin AKTAŞ

29.10.2007

çapkirin