Kurdan bi hilbijartinan ra sînor rakirin !

Ahmet Aktaş

Dibe ku bi piranî mirov, bi piralî  nabîne di vê hilbijartinê de qonaxa asta deskeftiyên Kurdan çendîn berfireh e.

Li gel hemû kemasî û xelitiyan jî, qet gûman tê de nîne ku aşkere Kurd bi asteke gelek berçav û bilind bi serketin. Lê ji ber ku cara yekemîn e bi vê giranîyê û vê mezinahiyê di warê siyasî de deskeftinek e gelîrî pêktê, gel, bi kêfxweşiyek e bilind ev şahiya xwe pîroz kir.

Wisa diyare ku, AKP/Dewletê jî, erê gûman dikir in dê Kurdê di hilbijartinan da hinekî bi serbikevîn lê ne li benda bi vê mezinahiyê bûn.

Dema ku pêhesiyan deskeftî gelekin, hema di cih de yên weke Cemil Çiçek rabûn ne razibûnên xwe eşkere kirin. Ew jehra mejiyên xwe yê nijadperest da der.

Lewma got, eha Îdir jî girtin û gihiştin sînorên Ermenistanê û hewd. !  Erê dûv re Receb xwest van gotinan hineki pîne bike, lê ewqas kun firebûbû êdî durûtina Receb jî pere nekir û bêfeydebû.

Niha siyaseta dewletê gelek tengav bûye. Arteş demek e kurt bêdeng sekinî, lê bi yekdu gotin be jî hilwesta xwe ya nerazibûnê dane xuyakirin. Herwiha nîşan dan ku di demek nêzik de ewên berfireh dîtînên xwe ji çepemeniyê re bêj in.

Ji xwe êrîşên wan yên hovane dîsa da despêkirin; li Agiriyê, li Rihayê û hwd.

Nikarin xwe ragirin/tehamulbikin, ji van deskeftiyên Kurdan. Eger mirovbûna, dê ew jî weke Kurdan dilxweş bibûna û bi hev ra ev şahî pîroz dikirin. Lê na herê, xuya dike hîn mejiyê vê dewletê ji vê rûmeta mirovatiyê dûr e.

                                    *   *   *

Receb, hîn dev ji qebedayitiyê xwe bernade. Weke ku ti tiştek nebûbe hîn wê siyaseta xwe ya bêxêr dide meşandin. Vê carê jî dîsa ew savara rijî û sar dide ber Danimarka, da ku Roj TV bigerin.Her wiha ji filan dewletê û bêvan dewletê dîsa piştgriyê dixwaze.

Nuha jî hemû hêvî û hewara xwe dane destê Obama. Li goreyî saloxên Receb û Gul didin çapemeniyê, Obama soz daye wan û li ser gotinên Wî, bi Rasmussen re lihevhatin in û serokatiya wi ji bo NATO qebûl kirin in.

Hatina Obama ya Tirkiyeyê û bi giştî gera wî, bêgûman giring e û divê analizên berfireh bêne kirin li ser vê mijarê. Di nivîsên xwe yên rojên were de emê li ser rawestin.

Belê tiştekî eşkere, rast û mafdar heye, ew jî ev e: Gelê Kurd di vê hilbijartinê de, hema hema em dikarin bêj in sînorên nava perçeyên Kurdistanê bi temamî rakir in. Ev jî helalî xweş be ji gelê me re.

Ji xwe mafê gelê me yê dîrokî, mirovatî, xwezayî, yasayî û hwd. Bi tenê siyasî ma bû, ê vî jî gav bi gav bidest dixi.  Vêna jî bi keda xwe û bi xwîna xwe distîn e, weke sedeqa ji destê kesî nagri. Weke şîrê diya wî lê helal e.

Xwendevanên hêja, ji kerema xwe re hûn jî careke din li ser nexşeyê/xeriteyê li sînorên nava Kurdan binerîn, ez bawerdikim hûnê dilxweş bibin. Yên weke Cemil û Receb û Başbug û kî nerihet dibin-nabin jî xem nîne, ew pirsgrêka wan e.

Lê ez bawer dikim hûnê kêfxweş bibin, eger hûn xemsariyê nekin û temaşe bikin, bimînin di nava temaşekirinek xweş de !

Şemsettin Aktaş

6.4.2009

çapkirin