Tirsa ji perwerda zimanê dayikê

Ahmet Aktaş

Naveroka pêvajoya 'vebûna pirsgrêka Kurd' rojberoj gûrtir, germtir û geştir dibe.

Her çendîn buhura 'vebûna pirsgrêka Kurd' fireh dibe tirsên Dewleta Tirkiyeyê jî zêdetir dibe.

Deniz Baykal dibêje, „ziman ji terorê xetertir e“, ev hilwest him rastiyekê û him jî tirsa dewletê xweşik dide dest.

Tirs û nerazîbûn û nerihatiya herî mezin, perwerde û hîndebûna bi zimanê dayikê ye.

Dixwaze di vî warî de hîlebazî û sixtekariyê bike.

Dibêje, başe bila zimanê Kurdî azad be, lê belê bila ev maf; ne ji dibistana seretayî despê bike, bila li xwendegehên bilind(universitan û hwd.) weke enstituyan an jî waneyên(dersên)bijartî were dayîn, an jî kursgehên zimanê Kurdî vebin.

Gelo ev çito/çawa azadî ye û çi edalet e?

Ji alî wan va; ji alî mejiyên wan ê zîhnîyeta serdest bête temaşe kirin, mirov wan mafdar dibîne!

Ji ber ku eger zarok ji despêkê de bi zimanê dayîka xwe dest bi fêrbûna jiyanê bibe, wê demê weke kesekî xwedî nasnama gelê Kurd dibe endamê jiyanê, lê na eger weke ku ew dibêjin bibe, wê demê ew zarok weke Tirkekî dibe endamê jiyanê.

Ev jî lîstina bi çarenûsa/qedera însana ye, ev xerakirina xweza û mirovatiyê ye.

Bi vê ve girêdayî mijara mafê takekesî, ne mafê grubî(an jî yê gelî)  heye!

Ev mijar jî, her weke mijara zimanê dayikê, Dewleta Tirkiyeyê xistiye nava tirsek e mezin, lewma ew jî hewldide ji bo vî mafî nede.

Ez bawer nakim ku Dewleta Tirkiyeyê bikaribe di van mijaran da bi serkeve, ji ber ku ev siyaseta Dewletê him ne zanistî ye, him jî li cîhanê mînakên bi vî rengî; gelê ku mafê xwe yê netewî yê xwezayî ne sitandiye nemaye, an jî kêm maye.

Mînakên ku gelek behsa wan têne kirin, Bask, İrlanda, Galiçya, Korsika û hwd.

Ji bilî gelek nivîskar û rewşenbîran, gelek rêvebirên Dewleta Tirkiyeyê jî van mînakan dubare dikin, lê belê ji bîr dikin ku li vir jî bi xwe re nakokin û siyaset û kiryarên wan li ser Kurdan gelek gelek durî van welatan û van gelan e.

Mijarek din jî heye û hêjayî gotinê ye, ev jî mijara ku dibêjin 'ma Kurd çi dixwazin(?) em nizanin, an jî xwestinên wan ne zelal e'.

Ev jî derewek mezin e, ji bo xatirê wan(ku xatir mabe) em careke din ji wan ra bêj in, bila dubare û sêbare û...bibe:

Hûn weke gelê Tirk xwedî çi mafî ne, em jî weke gelê Kurd hez dikin xwedî heman mafan bin!

Qut Kurmancî, xwestina me ev e û hûn dibînin ku çendîn zelal e û delal e û adil e!

Ahmed Aktaş

24.8.2009

çapkirin