JI GUNEHAN RE

                                                                      Bêkes Reşîd

                                                                      09 / 09 / 2008

                                                           Bo gunehên min yên di rê de.

Nû demeke ji pîvana xwe reviyayî

Nû hesteyek

Ji nû…

Bêyî dûrayî

Ligel wateyeke ne bi ser xwe de çemîyayî

Hemû şaxên kirineke nû

Kiryarin berevajî bi wergirtinin cîwaz

Hindek divayên ko wê ji nûjeniya xwe bikevin

Silbûna mendaleke ko ji şîr vedibe

Ta…

…xwe bi jibîrkirinê re winda bike

Ji gelek tiştan nêzîktir

Tepisandina vîna wicdanekî vepejilî

Tê de…

Li dûv min…

Bêyî bi xwe zanîbim

Min nizanîbû

Çima ev lez?

Çima ev ne levkirina helbestê?

Mîna van bajarên ko bi çavên xwe avadikim

Xwestekeke yekser ji jêdereke mirî

Aydiyolociya ko valayiya ciyê min dide

Dive ko yek ji pîvanên ramanî be

Çend verêkirinên nirxkirî

Tu dibe belkî çend mirovin!!

Berî hertiştî, hay ji te heme!!

Ta vê bîskê jî

… min digot qey ezim

Ev veguhastinên nediyar

Ji çi re?

Lew re…

Bîlanço û temenkî cuda

Madem hûn bi xwe azadin

Madem kesek bêyî Platformeke taybet niye

Tu çi dibêje?

Hûn çi dibêjin?

Bi dizî

Hêdî hêdî…

Ji xwe û tiştin din re dipistînim

Pişkeke din li hêlên xwe dikim

Dawîyeke arişîyî bi rêmaneke serbixwe

Bi hewla vegerekê

Ji çavên xwe jî derkeve… ne xeme!!

Tenê bo wî bêyî xwe nehêle.

………………………………………….

çapkirin