10 roj û metelek din

Xweda erd û ezman

Di 7 rojan de avakir.

Di kenê te de 10 rojan ma!

Lê dema xwestibû 

Rokê di sînga ezmên de bi cih bike

Metel mabû ko ê çewa

Dest pê bike

Lê gava çav li navika te ket

Metelmayîna xwe deyna aliyekî

Û rok mîna navika te

Gilover û xweşik çêkir.

Kîyê ji bilî te?

Tu ken î

Kîyê te birevîne ji bilî min?

Tu bejn î

Kîyê te himbêz bike ji bilî min?

Tu dilbijîn î

Kîyê kela te vimirîne ji bilî min?

Tu pizot î

Kîyê wêribe nêzîkî alava te bibe ji bilî min?

Tu buhar î

Kîyê kulîlkan ji te bidize ji bilî min?

Tu kaniyî

Kîyê ava te vexwê ji bilî min?

Tu evîn î

Kîyê bi te birame ji bilî min?

Tu kujar î

Kîyê min bikuje ji bilî te?

Sûda evînê

Tev dizanin

Ko dêmê erdê gilover e

Û bê gûman jî

Digere.

Lê a ko pê nizanin

Ev e:

Dilên evîndaran

Wê gilover dike

Û bi hêza evîna wan jî

Ew digere.

Axaftin…

Gava Xweda xwestibû

Bi nazikî, bi delalî, bi aramî,

Bi evînî, bi tenikî,

Bi keskayî, bi hêdî, bi nermî,

Bi kurtepistî, bi hûrikî…

Bi erdê re biaxife

JIN çêkirin.

Fermooo…

Dilê min bê kilîte,

Bê deriye,

Bê pencereye...

Û li ser 4 aliyên evînê vekiriye

Fermo

Hemû

Jinên

Cîhanê

F

E

R

M

O

O

O...

Ji bo te 3ê reng

Ez ê ji bo te

3ê helbestan binivisînim

Yeke spî

Yeke sor

Yeke hişîn.

Ya spî:

Dako tu ji xwe re bikî nivîn

Ya sor:

Dako gurzek gul diyarî te bike

Ya hişîn:

Dako tu têde melevaniyê bikî.

T îbûn

Ji kaniyê

Têr av vexwar.

Û li benda hatina te

Ji tîbûna re

Mir!

Tu û Çem

Gava tu seyrana xwe

Di ber çem re dikî

Av zelaltir dibe

Û bi evînî diherike.

Gava tu avê jê vedixwî

Dilê çem sivik dibe

Û ber bi evîndaran ve diçe.

Gava tu têde

Melevaniyê dikî

Ji şahiyan re rêça xwe

Şaş dike

Û xwe di dilê te

Wer dike.

Rojbûna te

Li

Rojbûna te

Ez ê gurzek Gulên êşê

Diyarî te bikim

Dako tu bizanibî

Birîn,birîn e

Û ez ji bo evîna te

Hemdem birîndar im.

Bizanibe ez mirim

Eger rojekê tu hatî û ez nedîtim

Bizanibe ko ez li wirim.

Eger tu hatî wir jî û dîsa ez nedîtim

Bizanibe ko ez li cihekî dûrtirim.

Eger tu hatî wî cihê dûrtir jî

Û dîsa ez nedîtim

Xemgîn nebe,

Kulîlkek sor di dilê axê de biçîne

Û bizanibe ko ez mirim.

Husên M. Hebeş

               Husên M. Hebeş