Ji edîtor,

Xwendevanên hêja û delal,

Çawa ku tê “gotin” jî “berê gotin hebû”, belê ev gotin rast e û qet şik û guman tê de tune ye. Lê em îro nexşeya ruhê xwe û  alavên derbirînê, metaforên zanapeyv, hêmayên rênîşander bidin ber hev, em ê lê varqilin ku gotin asta pêşîn û rewşa nanozikoyî ye. Çawa ku îro bo jimartinê tiliyên destên me reben û sêwî dimînin, em dikarin danberheveke ku paralelî vê mînakê bidin ku êdî gotin têra derbirîna me û vê cîhana şêt, qure, borbore, gewî, têrxwarî, zamorte û zalim nake.

Bi vê niyetkirinê em dikarin bibêjin ku wêje (nemaze jî çîrok û roman) ne gotin e, vegotin e. Ji ber ku gotin di vir de ragihandin û neqilkirinê bi bîra me dixe lê vegotin bi gotinê qanih nabe û hewl dide ku rêyeke nû ji xwe re bibîne. Ji ber ku qîma xwe bi tiştên heyî nayne hêjayî pesindanê ye û mirov dikare bibêje ku şoreşger e jî. Wêje vegotin e û em dikarin piçekî din jî pêş de herin û bibêjin ku “çep”tirîn û “pozbilind”tirîn awayê vegotinê ye.

Gotin  dikare di otobosekê de li ber camê rûnê û çi tiştên ku dibîne ragihîne me. Lê vegotin dikare awayê rûniştina rêwiyan, profîla rêwiyan, bêhna ku ji rêwiyan difûre, çavên sorbûyî, mijê ku di çavên wan de kon vedaye, mitaleyên wan ên koç û rêwîtiyê û hwd.  ya ji neynika hundir a otobosê dixuye de ji me re bibêje.

Gotin rîs be, vegotin tevn û dolab e. Gotin daringa xav be, vegotin fabrîqe ye. Gotin simbil bin, vegotin dêrandin e.

Ji ber ku di çîrokên ku ji me re tên de gotin li ser vegotinê tê girtin û ev jî ji bo wêjeya kurdî elem û kelem e, me xwe avêt dexlê daxuyaniyên li jor.

Di vê hejmara me de Kawa Nemir, birek soneyên William Shakespeare wergerandiye kurdî, serê lodê girtiye û eşkere kiriye ku bergîdana van helbestan bi kurdî jî hene!  Me di vê hejmarê de hevpeyvînek bi Rênas Jiyan re kir û gelek fikr û bîr û boçûnên balkêş derketin holê.

Di vê hejmarê de me mijara dosyeya xwe wek kurdolojî diyar kir. Tevî ku ne li gor konsepta me bû jî ji ber ku mijar aktuel bû û dihat nîqaşkirin û zelaliyek jê re pêwîst bû me girt dest. Em hêvîdar in wê dosyeya me sûdewar be.

Dîsa kurdan qûna dilnexwazên xwe dan tavê û 98  (nod û heşt) şaredariyên qut û gilover bi dest xistin. Vê hilbijartina 29’ê adarê bi me dide hîskirin ku kurd mîna pêlan êdî didine ber xwe. Her çiqas piştî encamên hilbijartinê êrîş birine ser DTP’ê jî  em dizanin ku ev êrîşkar çawa har bûn wê wisa sar jî bibin. Heke ku serdest û êrîşkar “dîn” bin divê zanibin ku em kurd “perçe perçe” ne. “Ew” serdest in û divê baş bizanibin ku em -Kovara W- ji roja roj de li ser destnimêja xwe ne û bi alav, derfet û platformên afirandinê ku bi giştî mebesta me jê huner e em ê “bavê serdestan bînin ber çavên wan.”

Û tekane rojnameya rojane ya bi kurdî Azadiya Welat bi sedemên vala ji aliyê dewletê ve hat girtin. Ev ne bes bû rabûn rojnameya rojane ya bi kurdî Rojev jî bi sedemên pûç û vala girtin. Di van wextên ku dewletê agir xistiye dawa xwe em zilm û zordariya li ser rojnameya Azadiya Welat û kurdî şermezar dikin.

Em dixwazin agahiyekê jî bidin xwendevanên xwe. Edîtora me Enîse Şîrîn ÇAGER ji ber rewşa xwe ya tenduristiyê wê êdî ne bi me re be.

 Em Cejna Zimanê Kurdî, 1 Gulan Cejna Kedkaran û Roja Dayikan li hemû xwendevanên xwe pîroz dikin.

Gulan e û em deftera xwe didin ser deftera çand û wêjeya kurdî.

NAVEROK

n Ji edîtor / 2

n Rêka dibistanê - Brahîm RONÎZER / 3

n Tu ku de diçî - Mehmet DEVÎREN / 6

n Rojên derew -Yûsiv BIYANÎ / 6

n Girrê zilamtiyê - Lokman AYEBE / 7

n Guldesteyek helbest - Reyhan SARHAN / 10

n Carinan mirov xwe jî dikuje - Şener OZMEN / 11

n Strî û gul - Dilşêr BÊWAR / 18

n Veqetîn  - Baxdat ARDA / 18

n Ji min re bibêjin Îsmaîl - Yavuz EKÎNCÎ / 19

n Êdî bêhna te tê - Nesrîn NAVDAR / 22

n Goristana hêsrên rizyayî - Îrfan AMÎDA / 23

n Xwircezîna dil - Fatma SAVCI / 24

n Tazî - Şevger ÇIYA / 25

n Dosye: Kurdolojî; çi, çima, çawa? - Serwet DENÎZ - Elîxan LORAN / 32

n Kurtebehseke pêşketina kurdnasiyê (1988-2008) - Rohat ALAKOM / 33

n Daxwaza kurdan perwerdehî ye ne kurdolojî ye - Samî TAN / 41

n Efrasyab Hewramî: Kurdnasên Sovyetê li pey berjewendiyên dewleta xwe bûne - Hevpeyvîn: Azad ZAL - Serwet DENÎZ / 43

n Lêkolînên kurdolojiyê li Fransayê - Salih AKIN / 51

n Kurdolojî: Zanista hesta netewî - Mihemed RONAHÎ / 57

n Di romana kurdî de pêngaveke pirhêl: Rojnivîska Spînoza - Yapob TILERMENÎ/ 60

n Rênas Jiyan: Helbest derb e  - Hevpeyvîn: Elîxan LORAN / 64

n Portre - Fewzî BÎLGE / 73

n Ji William Shakespeare çend sone - Kawa NEMIR / 72

n Di neynika pirtûkê de - Yunus EROGLU / 78

n Civîna Wyê bi xwendevanan re - / 80

çapkirin