Dr. Zorab

Ferhenga Nûjen

Almaniya: Welatek e, li ku Tirk mafên Kurdan dipejirînin. Ew herdem hevaltiya serdaran û dijminahiya bindestan dike. Kî ji vî welatî hez nake, bila jê biçe.

Anatoliya: Rojavayê Kurdistana Bakur e.

Atatürk: Bavê gelê Tirk e. Tê zanîn, ku sê bavên wan yên din jî hene: Oguz, Selçûk û Osman.

Aştî: Rewşeke balkêş e, dema şer hatiye sekinandin, lê bêşerefiya dijminan berdewam e. Wateya wê ev e: Dema tu nikaribî destê kesekî gez bikî, maç bike.

Azadî: Ew rewş e, ku dema mirov serbest e, dikare bi kêfa xwe axayên xwe hilbijêre.

Batman: Du wateyên vê têgîna han hene: 1) Ew navê bajarekî Bakur e; 2) Mêrxasê fîlmên Amerîkî ye.

Bexda: Paytexta Îraqê û bûka balafirên Amerîkî ye.

Celadet Bedirxan: Ew berî çend salan çû ba Xwedê û jêre got: Xwedayê Mezin! Xebata, ku min di nav Kurdan de kiriye, di vê dema dawî de gelek encam daye. Ez bi neheqî ji jiyanê hatim bi dûrxistin. Ji kerema xwe, hema destûra min tenê sê rojan bide, ez biçim ba Kurdan û hinde tiştên, ku rê nekete min, ez nîşanî wan bidim û rêya rast û dirûst bikim. Xwedayê Mezin lava Mîr Celadet pejirand û ew di roja Newrozê de dakete nav Kurdan. Lê piştî du rojan ew dîsa vegeriya jor. Xwedayê Mezin jêre got: Mîrê Botan! Min sê roj destûr dabûn te. Tu çima tenê du rojan mayî? Mîr Celadet got: Xwedayê Mezin! Min dît, ku rewş ne ligor texmîna min e. Min dît, ku Kurdên helbestvan bûne ramyarzan, yên zimanzan jî bûne helbestvan û yên nezan jî bûne zimanzan.

Ereb: Milletek li Rojhilata Navîn, yê di warê zimên de pismamên Cihûyan e. Ereban sond xwariye, heya felek şên e, ew nabin yek.

Erebî: Zimanê Ereban, yê ji Kurdan re ji ber du sedeman girîng e: 1) Qurana Kerîm bi Erebî hatiye pêşkêşkirin; 2) Li Cezîrê û Kerkûkê cihê zimanê Kurdan digire. Ji ber ku Qurana Kerîm pê hatiye nivîsandin, divêt Kurdên Başûr bi ti awayî dest jê ber nedin.

Ewropa: Parzemînek, li ku xwepêşendan û mîhrecanên Kurdan qedexe nînin.

Êzdatî: Dînê Kurdan, yê dev ji Kurdistanê berdide û koka xwe li Almaniya, Hollanda, Rûsiya û Kafkasê diatîne. Ew koka gelê Kurd in, kengê ew bûn yek, yekîtiya Kurdan jî dê zû pêk were.

HADEP: Partiya gel e, Kurdan digihîne hev, Tirkan jî fêrî demokrasiyê dike.

Îbrahîm: Navê du kesan e. Herdu jî li Kurdistanê ji dayîk bûne û xêra welatê me di nav xelkê de bela kirine: Hz. Îbrahîm û Îbo Tatlises.

Îsraîl: Biçûktirîn dewleta Rojhilata Navîn e, lê belê kesek jî pê newêre.

Kakeyî: Dînê Kurdan, di nav kîjanî de ji jinan re dibêjin “kekê”.

Karsaz: Saziya maldarên Kurd, ya li zozanên Ewropayê penîr der dixe.

Kemal Bûrkay: Serokê PSK, yê hemû serokan ji bo demdirêjiya serokatiya wan rexne dike, lê bi xwe ji wan zêdetir partiya xwe birêve dibe.

Kerkûk: Şehrê Kurdan, li ku Ereb Tirkmanan bêmal dihêlin.

Kurdistan: Welatekî dîrokî, yê di navbera çar dewlet, çardeh ol û çel partiyan de hatiye parvekirin.

Mirovahî: Beşek jê Kemalîst in û beşê din jî ji mirovên cîhanê yên mayîn pêk tê.

Newroz: Cejna me ya neteweyî: 21ê Adarê Împeratoriya Med zordarên Aşûr şikênandin, gel di ser agir re bazda, dota Kurd jî kevir avête metîngeran. Dibêjin, ku hersal di vê rojê de Ecevît serdana Monxoliyayê dike, da ku înfrastrûktûra vegerandina Tirkan amade bike. Ew cejn e, ku li her derê bîhna kulîlkên Buharê destpê dike, lê li Bakurê Kurdistanê bîhna tekerên erebeyan.

Özgür Politika: Rojnameya Kurdan, ya bi zimanê Kurdan î hevbeş, ango bi zimanê gelê bra tê weşandin.

Qurana Kerîm: Pirtûka Pîroz, ya ku ramana Yekîtiya Xwedê û mezinahiya zimanê Ereban bi pêş dixe.

Rewşenbîr: Xwendayên, ku rewşa xwe ji bîr nakin.

Rewşenbîrê Kurd: Ew mirov e, ku ligor krîterên “Kopenhagen”ê wek rewşenbîr bê pejirandin. Krîterên here hêsan ev in:

a) Divêt di her warekî zanistiyê de şareza be.

b) Divêt dîbaca Ehmedê Xanî ji ber kiribe.

c) Divêt “Hawar” giştik xwendibe.

d) Divêt bikaribe sirûda “Ey Reqîb” bi zaravên Başûr û Bakur bê çewtî û bi dengekî bilind bêje.

e) Divêt bi kêmasî sîh gotinên pêşiyan ji ber zanibe. Eger 29 bin, çê nabe.

Selaheddînê Eyûbî: Penaberekî Kurd li Misirê, yê berî Ewropiyan da û Mala Îslamê (Dar ûl-îslam) rizgar kir. Piştre Kurd wê ji Mala Îslamê birevin û li Ewropayê bibin penaber.

Stenbol: Bajarekî Bîzantî, yê ji aliyê Tirkan ve ji bona xatirê niştecihên Kurd hatibû dagîrkirin.

Tirk: Milletekî reben, yê bi sedan salan qurbana terrorîstên Çîn, Faris, Grêk, Serb, Ermenî, Ereb û Kurdan e.

Tirkî: Zimanê Kurdan î hevbeş e.

Zarok: Merivekî biçûk e. Eger tu wî danî ser çoka xwe, ewê destê xwe biavêje simbêlê te.

Zerdeştî: Dînê kevin li Kurdistanê: Wisa kevin, ku êdî nahê bîra kesekî.