Dr. Zorab Aloian

Hedef

(Satîra reş li dor Navenda PENa Kurd)

Gelî ciwamêran, werin, werin, mal û jiyana van kesan helal e! Ev kesên ji milletê jinkujan li Kurdistanê alizîbûn, niha jî direvin û di welatên Xaçparêzan de xwe ditelînin. Lê ew nikarin ji şûrê rastiyê bifilitin. Zemanê Cîhada Mezin li himber wan hatiye, ji bo qidûma wan bişikê. Hûnê bipirsin: Ew li ku derê ne? Emê bibêjin: Ew keda xwe didin Navenda PENa Kurd:

- Celîlê Celîl, lêkolînerê bi nav û deng ji Ermenîstanê. Gunehên wî: a) Kurdê Êzdî ye; b) Di nîvê salên 1990î de wî nermbûnek xiste nav nakokiyên di serweriya Navenda PENa Kurd de.

- Emerê Cengîz, helbestvan û xwendekarê ji Bakur. Gunehên wî: a) Kurdê Êzdî ye; b) Bi jineke Êzdî re zewicî ye.

- Dr. Eskerê Boyîk, yek ji giringtirîn helbestvanên Kurd ji Ermenîstanê. Gunehên wî: a) Kurdê Êzdî ye; b) Carekê gotibû: Ez zanim, Kurdistan wê hebe.

- Ezîzê Cewo, lêkolîner û rojnamevan ji Rûsiyayê. Gunehên wî: a) Kurdê Êzdî ye; b) Nûnerê Navenda PENa Kurd li Yekîtiya Komarên Serbixwe ye.

- Hoşeng Broka, lêkolîner û helbestvan ji Başûr-Rojava. Gunehên wî: a) Kurdê Êzdî ye; b) Bingeha cîhanbîniya Kurdistanê aşkera dike.

- Dr. Kemal Sîdo, lêkolîner û xebatkarê mafên mirovan ji Başûr-Rojava. Gunehên wî: a) Kurdê Êzdî ye; b) Ji bo mafên mirovan xwe diêşîne, her weku mirovê Êzdî hêjayî mafan be.

- Kemal Tolan, berhevkarê zargotinê ji Bakur. Gunehên wî: a) Kurdê Êzdî ye; b) Çanda xwe ya kufretê di çarçoveya Kurdan de dinirxîne.

- Selîm Biçûk, helbestvan û lêkolînerê ji Başûr-Rojava. Gunehên wî: a) Kurdê Êzdî ye; b) Li ser rêzimana Kurmancî dixebite.

- Tariq Hemo, nivîskar û rojnamevanê ji Başûr-Rojava. Gunehên wî: a) Kurdê Êzdî ye; b) Bê şerm û fêdî di televîziyonên Kurdan de bi zimanê pîroz yê Erebî diaxive.

- Xebat Şakir, helbestvan û hunermend. Gunehên wî: a) Kurdê Êzdî ye; b) dilsozê doza Kurdistanê ye.

- Pîr Xidir Silêman, lêkolîner û siyasetmedarê ji Başûr. Gunehên wî: a) Kurdê Êzdî ye; b) Bi kurdî dijî, dipeyve û diafirîne.

- Dr. Zorab Aloian, dîroknas û zimanzanê ji Gurcistanê. Gunehên wî: a) Kurdê Êzdî ye; b) Sekreterê Navenda PENa Kurd e.

- Bi sedan endamên Mala Êzdiyan li Oldenburgê, Almaniya. Gunehên wan: a) Kurdên Êzdî ne; b) Di sala 2005an de ji bona alîkariya darayî ji Navenda PENa Kurd re konserteke bêhempa derbas kirin.

Gelî ciwamêran!

Hûnê nav û navnîşanên van hedefên le’netkirî ji Desteya Birêvebir ya Navenda PENa Kurd bixwazin. Xwedê Mezin e, gelî birayên pakij!

Bi debûş, kevir û çekan

Bê galegûrt û galegal

Herin bi ser wan!

Musil – Hewlêr – Îslamabad

Meha Rebî’ es-senî, sala 1428an ya koçê / Meha Nîsanê, sala 2007an ya Zayinê

çapkirin